Haldinn verður "Þjóðfundur" í Kaffi Hljómalind laugardaginn 22. nóvember 2008. kl. 12.00 til 14:00.

Fengist verður við lýðræðishugmyndina.

Þessi tala:

Haukur Már Helgason, ritstjóri NEI

Magnús Helgason, sagnfræðingur

Einar Már Guðmundsson, rithöfundur

Anna Björk Einarsdóttir - kynnir Yfirlýsingu um stofnun Nýs Lýðveldis.

Þessi spila og syngja:

Piknik (Steini Hjálmur og Sigga Eyþórs)

Elíney

Kynnir er Ellen Kristjánsdóttir, söngkona

Hvað er lýðræði? Hvert er eðli þess? Er lýðræði aðeins hugsjón, nokkurs konar draumur um betri tíð? Eða er um raunverulegan valkost að ræða? Hvernig verður stjórnarskrá til? Megum við sem þjóð skipa okkar málum sjálf?

Óreiða, fégræðgi og spilling manna í trúnaðarstöðum samfélagsins hefur undanfarið afhjúpast svo rækilega að enginn getur lengur undan litið. Og enginn er ósnortinn. Valdaklíkur þjappast saman sem aldrei fyrr og reyna að tryggja sér og sínum eilífa vist í sölum valdsins þar sem óhóf, vellystingar og munaður eru fyrirmæli dagsins. Alþýða landsins skal hneppt í þrældóm um þessa sömu eilífð. Henni er ætlað að vinna, hlýða og borga brúsann. Henni verður heimilt, með hæfilegu millibili að ganga að kjörkössunum og velja milli þeirra sem þegar hafa valið sig sjálfir til að stýra aðgengi að bólgnum sjóðum auðvaldsins. Gjaldheimtumenn hafa til hagræðis safnað þessu á einn stað. En þarf þetta að vera svona? Segir hver? Megum við kannski kjósa það sem okkur sýnist? Þegar okkur sýnist.

Aðgerðahópur "Frá lýgræði til lýðræðis"

Kjósum okkur sjálf.